Një 40-vjeçar shqiptar është shpallur në kërkim nga autoritetet zvicerane, pasi dyshohet se ka vrarë një 46-vjeçar ukrainas në qytetin italian Saronno. Sipas policisë italiane, ngjarja ndodhi pas një konflikti të papritur dhe pa një arsye të qartë, kur shqiptari nxori armën dhe qëlloi dy herë në gjoks viktimën.

Pas ngjarjes, autoritetet besojnë se i dyshuari ka kaluar kufirin drejt Zvicrës, duke tentuar të shmangë identifikimin. Përdorimi i kamerave të sigurisë ka ndihmuar policinë italiane në identifikimin dhe gjurmimin e tij. Tani, hetuesit zviceranë po rindërtojnë itinerarin e arratisjes së tij dhe besojnë se mund të jetë në kantonin e Ticinos.

I dyshuari ka një të shkuar të pasur kriminale, duke përfshirë akuza për trafik droge, grabitje dhe tentativë për vrasje. Ai besohet se jetonte në kushte të vështira, pa një adresë të qëndrueshme dhe përdorte një ndërtesë të braktisur në Cairate si strehë të përkohshme.