Gjatë fjalimit të tij në mitingun e Selanikut, kryeministri Edi Rama ka shprehur qëndrim kritik ndaj forcave të reja politike që po kërkojnë të rivalizojnë Partinë Socialiste në zgjedhjet parlamentare të vitit 2025. Ai i ka quajtur këto forca si “maskat e Sudes,” duke i krahasuar me personazhin e famshëm të firmave piramidale.

Rama theksoi se, pavarësisht se disa prej këtyre forcave kanë figura të reja, ato janë të ngjashme me përfaqësuesit e vjetër dhe nuk përbëjnë një alternativë të vërtetë. “Të gjitha llojet e fytyrave që iu dalin përpara dhe ju bëjnë fushë me lule, kujdesuni, janë maska të Sudes,” deklaroi ai, duke theksuar se pas këtyre maskave qëndron një kulturë politike dhe një qasje e ngjashme ndaj popullit.

Ai vazhdoi të thotë se këto forca politike kanë dështuar në të kaluarën, duke i përmendur si përgjegjëse për dështimin e shqiptarëve duke i zhytyr ata në borxhe. “Nuk ka lojë për të filluar me asnjë prej tyre, sepse loja e të gjithë atyreve ka mbaruar,” përfundoi Rama.

Kjo është hera e dytë brenda disa ditësh që Rama shpreh kritika ndaj forcave të reja politike, duke përmendur gjithashtu kreun e Lëvizjes Bashkë, Arlind Qori, të cilin e quajti “Sude me gjyzlykë” gjatë një takimi me pensionistë. Këto komente reflektojnë tensionin në politikën shqiptare ndërmjet partive tradicionale dhe atyre emergjente.