Ish-presidenti Donald Trump kritikoi ashpër sondazhet e fundit të publikuara nga The New York Times, duke i cilësuar ato si “të korruptuara” dhe “të rreme.” Gjatë një deklarate, Trump theksoi se shtypi dhe sondazhet janë të pavlera dhe përpiqen të krijojnë imazhe të gabuar mbi përkrahjen që ai gëzon. “Sondazhet janë po aq të korruptuara sa disa nga shkrimtarët atje prapa,” tha ai, duke iu referuar gazetarëve që merren me mbulimin e fushatës së tij.

Këto komente erdhën menjëherë pasi fushata e Trump publikoi një memorandum që akuzon The New York Times për tentativë të dobësimit të entuziazmit të votuesve të tij përmes publikimit të sondazheve negative. Në këtë memo, anketuesit e fushatës së Trump, Tony Fabrizio dhe Tim Saler, argumentojnë se sondazhet e The New York Times dhe Des Moines Register kanë për qëllim uljen e pjesëmarrjes së votuesve të Trump përmes një paraqitjeje të zymtë të perspektivave të rizgjedhjes së tij.

“Disa në media po zgjedhin të amplifikojnë përpjekjet për të zbehur dhe ulur entuziazmin e votuesve,” theksohet në memo. Sipas fushatës së Trump, këto sondazhe kanë mostra të njëanshme dhe paraqesin një numër më të madh të votuesve demokratë, duke mos reflektuar realisht trendet aktuale të regjistrimit dhe pjesëmarrjes së votuesve në të gjithë vendin.