Inteligjenca amerikane ka akuzuar Rusinë se është përfshirë aktivisht në operacione dezinformimi në shtatë shtete kyçe të SHBA-së, që do të përcaktojnë rezultatin e zgjedhjeve presidenciale të së martës. Shtetet në fjalë, Arizona, Nevada, Xhorxhia, Karolina e Veriut, Pensilvania, Michigan dhe Wisconsin, janë konsideruar thelbësore për të vendosur se cili kandidat – demokratja Kamala Harris apo republikani Donald Trump – do të marrë mandatin në Shtëpinë e Bardhë.

Në një deklaratë të përbashkët, Byroja Federale e Hetimit (FBI), Zyra e Drejtorit të Inteligjencës Kombëtare (ODNI) dhe Agjencia e Sigurisë Kibernetike dhe Sigurisë së Infrastrukturës (CISA), theksojnë se “Rusia është kërcënimi më aktiv” në këto shtete. Këto agjenci njoftojnë se përpjekjet e Rusisë në dezinformim mund të nxisin dhunë, përfshirë sulme të mundshme ndaj zyrtarëve zgjedhorë.

Sipas ODNI, një video e fundit në rrjetet sociale, në të cilën një person pretendon për mashtrime me fletë votimi të rreme dhe ndryshime të listave të votuesve, synon të krijojë perceptimin se procesi po favorizon kandidatin Kamala Harris në Arizona. Kjo video është shembull i përpjekjeve të intensifikuara të dezinformimit që kanë ngritur shqetësime të mëdha për sigurinë e zgjedhjeve në SHBA.