Një shpërthim i ndodhur mëngjesin e sotëm ka alarmuar autoritetet në Tiranë. Sipas policisë, incidenti ka ndodhur rreth orës 03:55 në një godinë të marrë me qira nga personazhi i njohur i TikTok, Kozak Braçi, në rrugën dytësore “Tiranë-Vorë”. Fatmirësisht, shpërthimi ka shkaktuar vetëm dëme materiale, pa të lënduar.

Në njoftimin e policisë, thuhet se dyshohet se është shpërthyer një sasi e vogël lëndë plasëse. Autoritetet janë angazhuar për të sqaruar rrethanat e ngjarjes dhe materialet janë dorëzuar në Prokurori për hetime të mëtejshme.

Godina e përmendur ka qenë në përdorim nga Kozaku për rreth tri javë, me qëllim transformimin e saj në një sallon për reklamimin e makinave. Gjatë javëve të fundit, ai ka pasur debate në rrjetet sociale me individë të tjerë që gjithashtu promovojnë automjete. Lënda plasëse dyshohet se i është vënë si mesazh kërcënues nga këta individë, duke e komplikuar situatën për Kozakun. Autoritetet vazhdojnë hetimet për të zbuluar rrethanat dhe motivet pas këtij incidenti të rëndë.