Skema e re e pensioneve që po diskutohet ndërmjet disa institucioneve nuk është përfshirë në buxhetin e vitit 2025, pasi ende nuk është finalizuar një formulë përfundimtare. Ministri i Financave, Petrit Malaj, gjatë një mbledhjeje në komision, deklaroi se vetëm pasi të përcaktohet skema e re, do të diskutohen mundësitë për financimin e saj.

“Projektbuxheti i vitit 2025 nuk e adreson skemën përfundimtare të pensionit apo bonuset që synohet të jepen, pasi jemi ende në proces. Kur të kemi formulën finale, mund të ulemi për të rishikuar buxhetin e shtetit,” u shpreh Malaj.

Për vitin e ardhshëm janë parashikuar vetëm 16 milionë euro për indeksimin e pensioneve dhe 37 milionë euro për bonusin e fundvitit. Bonusi i fundvitit është rritur lehtë me 1 milion euro, ndërsa ministri Malaj njoftoi se kjo rritje është bërë me synimin për të rritur vlerën e bonusit. “Për vitin 2025 kemi 3.7 miliardë lekë për bonusin e fundvitit dhe presim që vlera e bonusit të rritet,” shtoi Malaj.

Në total, për vitin 2025 janë parashikuar 53 milionë euro për indeksimin e pensioneve dhe bonuset, një shifër më e ulët krahasuar me 2024, kur u shpenzuan 78 milionë euro për këto qëllime.