Guardia di Finanza (GDF), DDA, Europol dhe Eurojust kanë realizuar një operacion të suksesshëm, duke goditur një organizatë kriminale të narkotrafikut që operonte me përdorimin e kodeve sekrete të komunikimit dhe pajisjeve teknologjike të sofistikuara, dyshohet se ishte Sky ECC. Ky grup, që transportonte miliona euro kokainë nga Amerika e Jugut, kishte kontakte të drejtpërdrejta me bazat e tij në Belgjikë, Holandë dhe Shqipëri.
Operacioni ka çuar në lëshimin e tetë fletëve-arresti, ku pesë nga të dyshuarit janë arrestuar dhe ndodhen në burg, dy janë nën arrest shtëpiak dhe një është nën detyrim për t’u paraqitur në polici. Hetimet kanë zbuluar se grupi kriminal po përgatiste një dërgesë tjetër të madhe të drogës, për të cilën janë kapur mesazhe të komunikimit me Shqipërinë. Pjesë e operacionit janë oficerët e Europolit dhe DDA-së së Milanos, të cilët kanë ndihmuar në deshifrimin e komunikimeve të kriminelëve, të koduara me teknologjinë e fundit, duke zbërthyer bisedat mes anëtarëve të grupit.
Hetimet kanë zbuluar një rrjet të organizuar kriminal, i cili vepronte midis Shqipërisë dhe Italisë, dhe kishte lidhje me organizata të tjera kriminale me origjinë shqiptare në Belgjikë, Holandë dhe Amerikën e Jugut. Ky grup trafikonin sasi të mëdha kokaine për në provincën e Milanos dhe Modenës dhe më pas përdornin metoda të pastrimit të parave për të fshehur fitimet e paligjshme. Gjatë periudhës gjashtëmujori, hetimet tregojnë se ky grup ka transportuar lëndë narkotike me vlerë mbi 5 milionë euro.
Operacioni është ende në zhvillim, me kërkime aktive në provincat e Milanos, Pavia, Monza dhe Modena, duke përdorur njësinë speciale të qenve “Cash Dog” dhe forcat anti-drogë. Grupi ishte duke përgatitur dërgesa të tjera të mëdha kokainë, mes Shqipërisë dhe Italisë, për t’i shpërndarë më tej në tregjet e Europës. Emrat e të dyshuarve ende nuk janë bërë publike, pasi operacioni është në proces.
