Zv.presidentja e Shteteve të Bashkuara, Kamala Harris, ka pranuar zyrtarisht humbjen në zgjedhjet presidenciale, duke telefonuar kundërshtarin e saj, Donald Trump, për ta uruar për fitoren. Sipas burimeve nga ekipi elektoral i Harris për CNN, ajo ka zhvilluar një bisedë të shkurtër telefonike me presidentin e zgjedhur, duke shprehur urimet e saj për suksesin e tij.

“Harris ka telefonuar presidentin e zgjedhur Trump për ta uruar për fitoren e zgjedhjeve presidenciale të vitit 2024. Gjatë bisedës, ajo theksoi rëndësinë e një transferimi paqësor të pushtetit dhe rolin e presidentit për të gjithë qytetarët amerikanë,” raportuan burimet për CNN. Kjo bisedë mes Harris dhe Trump-it zgjati vetëm një minutë.

Në orën 16:00 (22:00 me orën shqiptare), Harris pritet të mbajë një fjalim në Universitetin Howard, ku është diplomuar, për të reflektuar mbi zgjedhjet. Pas mbylljes së qendrave të votimit, Harris kishte zgjedhur të mos dalë publikisht, edhe pse rezultatet fillestare e vendosën Trump-in në pozicionin e fituesit të mundshëm. Ndërkohë, Trump shpalli fitoren e tij në mesnatën e së martës, vetëm disa orë pas mbylljes së votimeve.