Ndërsa Presidenti i zgjedhur i SHBA-ve, Donald Trump, vazhdon të deklarojë se është i gatshëm të dëbojë miliona njerëz të paligjshëm nga vendi, policia kanadeze po përgatitet për një fluks të mundshëm azilkërkuesish nga SHBA. Sipas rreshterit të policisë kufitare në Kanada, Charles Poirier, autoritetet kanadeze kanë filluar përgatitjet që disa muaj më parë për t’u përgatitur për një rritje të mundshme të migracionit të paligjshëm, sidomos nga ata që mund të frikësohen nga mundësia e dëbimit nga SHBA.
Poirier tha për mediat se përgatitjet u nisin pasi u bë e qartë se, në rast se Trump do të fitojë zgjedhjet, kjo mund të nxiste një rritje të migracionit të parregullt, kryesisht në provincën Quebec dhe në pjesën tjetër të Kanadasë. “Ne e dinim disa muaj më parë se duhej të fillonim të përgatisnim një plan emergjence sepse nëse Trump vinte në pushtet, gjë që ndodhi, kjo mund të nxiste migrimin e paligjshëm dhe migrimin e parregullt në Quebec dhe në Kanada,” tha ai për Reuters.
Gjatë mandatit të parë të Trump, në vitin 2017, mijëra azilkërkues kaluan kufirin drejt Kanadasë si pasojë e politikave të tij më të ashpra për imigracionin. Trump arriti të fitojë zgjedhjet presidenciale ndaj kandidates demokrate Kamala Harris, dhe kjo ka rritur shqetësimet për një fluks të mundshëm azilkërkuesish drejt Kanadasë.
