Hetimet për vrasjen e biznesmenit Ardian Nikulaj në Shëngjin po vijojnë, ndërsa portugezi Ruben Saraiva, i cili është i akuzuar për këtë krim të rëndë, është marrë sërish në pyetje nga Prokuroria e Lezhës. 28-vjeçari u paraqit nën masa të rrepta sigurie, i shoqëruar nga oficerë të policisë dhe i mbrojtur nga antiplumb në prokurori.

Në përballjen me prokurorin e çështjes, Françesk Ganaj, Ruben Saraiva ka qëndruar te deklaratat e tij fillestare, duke pohuar se kishte ardhur në Shqipëri si turist dhe se nuk kishte asnjë lidhje me vrasjen e Nikulaj. Avokati i tij, Kujtim Cakrani, ka theksuar se nuk ka asnjë provë të re që lidhet me akuzat dhe se hetimet pritet të mbyllen brenda muajit dhjetor.

Marrja në pyetje e Ruben Saraivës ka zgjatur rreth dy orë, ndërsa burime nga hetimet bëjnë të ditur se organi i akuzës është në pritje të ekstradimit të pesë shtetasve të tjerë nga Britania e Madhe për të mbyllur hetimet për vrasjen e Ardian Nikulaj.

Saraiva u ekstradua në Shqipëri më 31 dhjetor 2023, pas një vendimi të Gjykatës së Marokut, e cila pranoi kërkesën e autoriteteve shqiptare. Që nga ajo kohë, ai po qëndron në paraburgimin e Tiranës dhe ka mohuar vazhdimisht çdo lidhje me vrasjen e Nikulaj.