Një aksident i rëndë ka ndodhur të shtunën në mëngjes në segmentin Milot-Rrëshen të rrugës së Kombit, në afërsi të Urës me Harqe. Dy automjete janë përplasur fort rreth orës 10:00 të paradites, duke lënë gjashtë persona të plagosur, përfshirë katër gra. Të plagosurit, përfshirë drejtuesit dhe pasagjerët e dy mjeteve, u dërguan me urgjencë në Spitalin e Laçit, ku ndodhen jashtë rrezikut për jetën dhe janë në kujdesin e mjekëve.

Ndërkohë, një tjetër aksident është regjistruar në Fier, ku një mjet tip ‘BMW’ ka përfunduar në kanal pas përplasjes me një automjet tip ‘Benz’. Një person ka mbetur i plagosur dhe është dërguar në spital për ndihmë mjekësore.

Siç shihet nga pamjet, përplasja ka qenë mjaft e fuqishme dhe ka shkaktuar dëmtime të konsiderueshme në automjetet e përfshira. Policia ka mbërritur menjëherë në vendngjarje dhe ka nisur hetimet për zbardhjen e shkakut të aksidentit. Sipas informacioneve paraprake, parakalimi i gabuar i njërit nga automjetet ka qenë shkak për përplasjen e fortë.