Një aksident i rëndë ka ndodhur në orët e para të mëngjesit të sotëm, rreth orës 05:30, në aksin rrugor “Tepelenë-Fier”, ku fatkeqësisht kanë humbur jetën çifti i bashkëshortëve Vangjel dhe Marga Ajdini.

Sipas informacioneve të Policisë, aksidenti ka ndodhur kur shtetasi Sazan Arapi, duke drejtuar një automjet tip autobot, ka përplasur automjetin tip “Ford”, me drejtues shtetasin Vangjel Ajdini. Përplasja ka qenë fatale për drejtuesin e automjetit “Ford”, Vangjel Ajdinin, dhe për bashkëshorten e tij, Marga Ajdinin, të cilët humbën jetën në vendngjarje.

Nga ky aksident, drejtuesi i autobotit, Sazan Arapi, dhe pasagjerja që ndodhej në të njëjtin mjet, Arjanisa Arapi, janë dërguar në spital dhe janë jashtë rrezikut për jetën.

Aktualisht, grupi hetimor ndodhet në vendngjarje dhe po punon për të sqaruar rrethanat e plota të aksidentit dhe shkaqet që çuan në këtë ngjarje tragjike.