Në një kohë kur kryeministri Edi Rama ka premtuar shpërndarjen e dy bonuseve në vit për pensionistët, kryetari i grupit parlamentar të Partisë Demokratike, Gazment Bardhi, ka hedhur akuza të forta ndaj tij, duke e cilësuar këtë premtim si mashtrim. Sipas Bardhit, Rama i ofron pensionistëve një bonus vetëm një herë në katër vjet, dhe kjo ndodh vetëm në prag të zgjedhjeve për të fituar vota.

Duke folur në Parlament, Bardhi u shpreh: “Me pensionistët mendon se do t’i mashtrojë duke ndarë një buxhet minimal, duke i dhënë bonusin e fundvitit që e japin të gjitha vendet e rajonit. Ndërsa zotëria e bën një herë në katër vite. As bonusin e fundvitit nuk e ka vjetor. Prandaj në buxhetin 2025 nuk parashikon bonus për fundvitin 2025, sepse nuk ka ndërmend ta japë. E dha në 2020 për efekt të zgjedhjeve 2021. Po e jep në 2024 për efekt të zgjedhjeve 2025 dhe mendon se me këtë politikë do të gënjejë shtresën e pensionistëve.”

Bardhi nënvizoi se një kryeministër i përgjegjshëm nuk do të kishte nevojë të shpikte rrotën, por të ndiqte praktikën e vendeve të rajonit për të mbështetur pensionistët me politika të qëndrueshme. Ai theksoi se buxheti aktual nuk parashikon fond për rritjen e pensioneve dhe se ky fakt është dëshmi e politikave të varfra të qeverisë ndaj kësaj shtrese.

“Një kryeministër i përgjegjshëm do të thoshte sa është fondi në buxhet për rritje pensionesh. Zero. Një kryeministër i përgjegjshëm nuk ka nevojë të shpikë rrotën, por të bëjë atë që bëjnë kryeministrat e vendeve të rajonit”, përfundoi Bardhi.