Kryeministri Edi Rama mbajti një deklaratë për mediat këtë të mërkurë, ku komentoi rreth ngjarjes tragjike të vrasjes së 14-vjeçarit në shkollën “Fan Noli”, i cili u qëllua për vdekje nga bashkëmoshatari i tij. Rama theksoi se ky rast nxjerr në pah shqetësimin e madh për dhunën dhe bullizmin që po përhapet përmes rrjeteve sociale nga fëmijët dhe të rinjtë.

Në fjalën e tij, Kryeministri bëri të ditur se qeveria do të ndërmarrë një nismë konsultimi me prindërit në të gjitha shkollat, për të diskutuar mundësitë e ndërhyrjes në përdorimin e rrjeteve sociale, veçanërisht TikTok dhe Snapchat. Rama tha se, në bashkëpunim me prindërit, do të merret vendimi nëse do të mbyllen këto rrjete sociale për fëmijët nën 16 vjeç, ose nëse do të vendosen filtra për të kontrolluar aksesin e tyre.