Zbardhen detaje të reja rreth atentatit të ndodhur pak pas mesnatës të datës 19 nëntor, në zonën e Xhamllikut, ndaj 27-vjeçarit Klaudio Prendi. Sipas informacioneve të fundit, Klaudio Prendi, djali i ish-gjyqtarit të Krimeve të Rënda, Fran Prendi, i cili ishte larguar nga sistemi në vitin 2020, ndodhej në një lokal kur u ekzekutua. Ai ishte shoqëruar nga tre policë, shokë të tij.

Rreth orës 01:00 të mëngjesit, Klaudio Prendi është ngritur nga tavolina, ka shkuar drejt automjetit të tij G-Class, i parkuar disa metra larg lokalit, në rrugën kryesore. Në momentin që ka hipur në makinë, një “Audi A4” është afruar menjëherë dhe nga xhami i pasëm i tij është hapur zjarr në drejtim të tij. Ngjarja ka ndodhur shumë shpejt.

Për hetimin e ngjarjes, AMP (Autoriteti i Mbikëqyrjes Policore) ka nisur hetimet për tre efektivët e Policisë së Shtetit që ndodheshin në shoqërinë e Klaudio Prendit, për të sqaruar rolin e tyre pas krimit. Po ashtu, autorët e vrasjes kanë djegur automjetin në zonën e Shkozës, ku është gjetur arma e përdorur në atentat.