Policia ka bllokuar faqen në TikTok të një 16-vjeçari, i cili ka bërë thirrje për nxitje urrejtjeje dhe për promovimin e dhunës pas vrasjes së 14-vjeçarit Martin Cani. Sipas njoftimit të policisë, 16-vjeçari është kushëri i autorit të dyshuar të krimit. Ai, së bashku me një tjetër të mitur që e njihte autorin virtualisht nga grupet online, publikuan komente ku “duartrokasin” aktin e rëndë dhe shprehen se do të ndëshkojnë këdo që i kritikon.

Specialistët për Hetimin e Krimeve Kibernetike të DVP Tiranë identifikuan 16-vjeçarin që banon në SHBA dhe menjëherë nisën procedurat për ndjekje penale. Ky shtetas akuzohet për promovim të urrejtjes dhe nxitje të mbajtjes së armëve të ftohta nga të miturit, duke i përdorur në konflikte.

Materialet i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprën penale “Nxitja e urrejtjes ose grindjeve”, parashikuar nga neni 265 i Kodit Penal.

Autoritetet kanë apeluar për ndërgjegjësimin e prindërve dhe edukatorëve për të monitoruar aktivitetin online të fëmijëve, në mënyrë që të parandalohen sjellje të tilla të rrezikshme që mund të përshkallëzohen në dhunë.