Opozita shqiptare, përmes deklaratave të demokratëve Flamur Noka dhe Gazment Bardhi, ka kundërshtuar ashpër procesin e konsultimeve për caktimin e datës së zgjedhjeve parlamentare të vitit 2025, duke e quajtur një farsë të orkestruar nga qeveria.

Flamur Noka theksoi se Partia Demokratike nuk do të bëhet pjesë e një procesi që, sipas tij, është manipuluar paraprakisht. “Ne jemi opozita e vendit dhe nuk mund të marrim pjesë në farsa. Data është caktuar. E ka shpallur Taulanti para tre muajsh,” deklaroi ai, duke iu referuar deklaratave të mëparshme të kreut të grupit parlamentar të PS, Taulant Balla.

Në të njëjtën linjë, kreu i grupit parlamentar të PD-së, Gazment Bardhi, akuzoi kryeministrin Edi Rama dhe Taulant Ballën për uzurpim të procesit. “Tashmë Rama-Balla e kanë caktuar datën e zgjedhjeve, dhe Presidenti pritet vetëm të nënshkruajë e të vulosë vullnetin e partisë në pushtet,” tha Bardhi. Ai kritikoi procesin e konsultimeve, duke e cilësuar si një akt të shëmtuar që nuk respekton demokracinë dhe opozitën.

Opozita ka kërkuar që procesi të zhvillohet në mënyrë të drejtë dhe transparente, duke përfshirë gjithë aktorët politikë në vendimmarrje. Ndërkohë, qeveria nuk ka reaguar ende zyrtarisht ndaj këtyre akuzave.