Kreu i Komisionit Qendror të Zgjedhjeve (KQZ), Ilirjan Celibashi, ka konfirmuar pjesëmarrjen në takimin e thirrur nga Presidenti Bajram Begaj për të diskutuar mbi datën e zgjedhjeve parlamentare të vitit 2025.

Celibashi theksoi rëndësinë e kohës së nevojshme për përgatitjen teknike dhe organizative të procesit zgjedhor, duke theksuar se sa më shumë kohë të ketë në dispozicion KQZ, aq më mirë do jetë për mbarëvajtjen e zgjedhjeve.

“Sa më shumë kohë të kemi në dispozicion, aq më mirë do jetë për KQZ. Por është një çështje që i takon presidentit. Çdo datë që ai vendos, ne do të punojmë për realizimin e zgjedhjeve në atë datë,” tha Celibashi.

Takimi me Presidentin pritet të jetë një hap vendimtar për zyrtarizimin e datës së zgjedhjeve, ndërsa procesi po shoqërohet me diskutime nga aktorë të ndryshëm politikë. KQZ po vijon përgatitjet për të siguruar një proces transparent dhe të rregullt pavarësisht datës që do të dekretohet.