Shqipëria ka bërë debutimin e saj në programin më të njohur televiziv italian, Grande Fratello, që moderohet nga Alfonso Signorini, një nga emrat më të dashur të televizionit italian. Gjatë spektaklit të së martës në mbrëmje, në momentin kulminant të garës, kur aktori Luca Galvani mendoi se ishte skualifikuar, Signorini e ftoi atë të mendonte për mundësitë që mund të hapeshin për të.

Galvani aludoi se mund të rikthehej në lojë përmes një “shkëmbimi” në një tjetër edicion të Grande Fratello, një praktikë që ka ndodhur edhe me konkurrentë të tjerë. Në përgjigje, Signorini e ftoi aktorin të udhëtonte drejt Shqipërisë për të marrë pjesë në Big Brother Vip Albania. “Kemi sonte të pranishëm në studiot tona kolegët nga ‘Big Brother Vip Albania’, ndaj nëse do, mund të shkosh aty”, tha Signorini me humor.

Galvani, i njohur për aftësitë e tij kulinare, ia ktheu me batutë: “Nuk e di tamam se çfarë specialiteti kanë shqiptarët, por mund të bëj aty pasta me fasule. Shpresoj të m’i pëlqejnë”. Ky moment humoristik ishte një tjetër shenjë e bashkëpunimit dhe lidhjeve që po krijohen midis dy edicioneve të njohura të Big Brother.

Ndërkohë, producentja e Big Brother VIP Albania, Sara Hoxha, postoi në Instagram disa foto të një takimi miqësor me Alfonso Signorini, ku shkruante: “Së shpejti në Top Channel dhe Shqipëri”. Ky bashkëpunim i paralajmëruar mes dy projekteve ka ngritur pritshmëritë për një dokumentar që do të publikohet në Top Channel, ku Signorini dhe opinionistët do të flasin për Shqipërinë dhe shqiptarët.