Policia e Gjirokastrës ka arrestuar 5 persona të akuzuar për dhënien e ndihmës në kalimin e paligjshëm të kufirit, në kuadër të operacionit të koduar “Turn”. Katër prej të arrestuarve janë banues në Elbasan dhe janë identifikuar si M. B. (19 vjeç), A. T. (28 vjeç), J. S. (20 vjeç), I. Ç. (28 vjeç), të cilët u kapën për veprën penale “Ndihma për kalim të paligjshëm të kufijve”, kryer në bashkëpunim. Po ashtu, është arrestuar edhe shtetasi D. K. (22 vjeç), gjithashtu banues në Elbasan, i akuzuar për “Përkrahjen e autorit të krimit”.

Siç njoftoi policia, dy prej të arrestuarve, I. Ç. dhe J. S., nuk i janë bindur urdhrit të Policisë për ndalim në aksin “Ura e Kardhiqit-Tepelenë”, duke vijuar me shpejtësi dhe duke braktisur automjetin ku transportonin disa emigrantë nga vendet e treta që po përpiqeshin të kalonin ilegalisht kufirin drejt Malit të Zi. Pas ndjekjes nga forcat e rendit dhe koordinimit me DVP Fier, ata u kapën në “Rrethrrotullimin e Levanit”.

Gjithashtu, shtetasit A. T. dhe M. B. ishin duke qarkulluar me automjetin tip “BMW”, për të monitoruar rrugën dhe për t’i njoftuar ata për prezencën e Policisë, duke sinjalizuar për ndalimin. Policia ka vijuar hetimet dhe arrestimet për këtë rrjet të kalimit të paligjshëm të kufirit.