Një aksident tragjik ka ndodhur në Astoria, SHBA, ku një shqiptar ka shkaktuar vdekjen e një gruaje 36-vjeçare. Policia ka shpallur në kërkim 53-vjeçarin Bekim Fiseku, i cili akuzohet për përplasjen me kamion të 36-vjeçares, Amanda Servedio, më 21 tetor. Aksidenti ndodhi rreth orës 11 të mbrëmjes, dy blloqe larg shtëpisë së viktimës, kur Fiseku përplasi Servedion që po udhëtonte me biçikletë, duke e larguar me shpejtësi nga vendi i ngjarjes.

Sipas hetimeve, Fiseku është gjithashtu i dyshuar për grabitje dhe dyshohet se po i arratisej policisë në momentin e aksidentit. Pamjet nga kamerat e sigurisë tregojnë se mjeti tip “Dodge Ram” përplasi çiklisten në kryqëzimin e 34th Avenue dhe 37th Street, duke e shtyrë atë nga biçikleta dhe përplasur me një BMW të parkuar.

Servedio u dërgua menjëherë në spitalin Elmhurst, por nuk mundi t’i mbijetonte plagëve të marra. Policia nisi ndjekjen e kamionit, por shoferi refuzoi të ndalonte dhe u largua nga vendi i ngjarjes. Pas aksidentit fatal, kamioni u gjet i braktisur pranë Neëtoën Road dhe 47th Street. Policia ka nisur hetimet dhe po e kërkon Fisekun, i cili është shpallur në kërkim për këtë ngjarje tragjike.