Ministria e Mbrojtjes ka bërë një apel për qytetarët që të kenë kujdes gjatë qarkullimit me automjet për shkak të motit të keq që ka përfshirë vendin. Sipas një njoftimi, dy akse rrugore janë bllokuar në qarkun Shkodër për shkak të reshjeve të shiut, duke përfshirë aksin Prekal-Kir dhe Mes-Dukagjin. Sipas Ministrisë, strukturat e angazhuara janë duke punuar për të hapur rrugët.

Njoftimi i plotë:

Reshjet e shiut, që në disa zona kanë qenë të shoqëruara me intensitet të lartë, kanë shkaktuar bllokimin e disa akseve rrugore, kryesisht në qarkun e Shkodrës. Megjithatë, situata përgjithësisht është pa problematika serioze sa i përket infrastrukturës kombëtare:

•Aksi Prekal-Kir është bllokuar, por po punohet për hapjen e tij.
•Rruga Mes-Dukagjin është gjithashtu bllokuar për shkak të rrëshqitjes së gurëve, dhe po punohet për pastrimin e saj.

Po ashtu, disa zona të vendit janë pa energji elektrike për shkak të defekteve në rrjetin e furnizimit. Rajone të ndryshme, si Tirana, Durrësi, Elbasani, Berat, Vlorë, Korçë, Gjirokastër, Kukës, Shkodër dhe Burrel janë përballur me ndërprerje të energjisë elektrike. Punonjësit e OSSH janë në terren dhe po punojnë për riparimin e defekteve dhe rikthimin e furnizimit me energji.

Ministria e Mbrojtjes Civile po monitoron situatën dhe është në kontakt me prefekturat dhe bashkitë për të koordinuar punën në çdo rast nevoje.