Policia e Vlorës ka marrë masa të reja dhe ka ashpërsuar ndëshkimet për drejtuesit e mjeteve që shkelin rregullat e qarkullimit rrugor, veçanërisht ata që drejtojnë mjetin në gjendje të dehur ose përdorin telefonin gjatë vozitjes. Autoritetet bëjnë me dije se për këta drejtues, gjobat mund të arrijnë deri në 400 mijë lekë të vjetra, duke i dhënë një mesazh të qartë për rëndësinë e respektimit të rregullave të sigurisë rrugore.

Në kuadër të operacionit të monitorimit të qarkullimit, policia ka ndëshkuar drejtuesit e mjeteve që përdorin telefonin gjatë vozitjes, një praktikë e rrezikshme që shpesh çon në aksidente. Po ashtu, janë sanksionuar edhe shoferët që nuk respektojnë sinjalistikën rrugore dhe veprime të tjera që mund të rrezikojnë sigurinë e jetës së qytetarëve dhe përdoruesve të tjerë të rrugës. Për më tepër, drejtuesit e automjeteve që lëvizin nën ndikimin e alkoolit, duke u bërë shkak për aksidente, janë ndëshkuar në përputhje me ligjin.

Një rast konkret është ai i një shtetasi që u arrestua mbrëmjen e së shtunës për drejtim mjeti në gjendje të dehur. Ky aksion i policisë synon të parandajë aksidentet dhe të ruajë sigurinë e qytetarëve.

Policia e Vlorës ka bërë të qartë se është në fokus gjithashtu kontrolli i mjetëve me xhama të zinj, të cilat nuk janë pajisur me letër identifikuese, si dhe ata që drejtojnë motoçikleta pa përdorur kasën mbrojtëse. Në këtë kuadër, policia u bën thirrje të gjithë drejtuesve të mjeteve që të tregojnë kujdes maksimal në rrugë, të mos drejtojnë mjetin nën efektin e alkoolit dhe të respektojnë rregullat e sigurisë për të parandaluar aksidentet dhe për të mbrojtur jetën e kalimtarëve dhe përdoruesve të tjerë të rrugës.