Të paktën shtatë persona kanë humbur jetën dhe më shumë se 30 të tjerë janë lënduar si pasojë e një aksidenti tragjik rrugor në rajonin San Martin, në veri të Perusë. Ngjarja ndodhi në autostradën Fernando Belaunde Terry, kur një autobus u përplas me një furgon në një kthesë të fortë.

Sipas Ministrisë së Brendshme të Perusë, shoferi i autobusit ka humbur kontrollin, duke bërë që mjeti të dalë nga rruga dhe të bjerë në një greminë. Autobusi, i cili kishte 58 pasagjerë, ishte nisur nga qyteti Piura dhe po transportonte, ndër të tjera, 23 studentë që po shkonin në një ekskursion drejt rajonit të Tarapoto, sipas agjencisë peruane të lajmeve Andina.

Në këtë moment, ende nuk janë zbardhur plotësisht rrethanat që çuan në këtë aksident tragjik. Grupi hetimor është duke punuar për të zbuluar shkakun e këtij incidenti, ndërsa autoritetet po vazhdojnë përpjekjet për të ofruar ndihmën e nevojshme për të mbijetuarit dhe për të zbardhur ngjarjen.