Për të dytin vit radhazi, opozita shqiptare festoi 28 Nëntorin, ditën e Pavarësisë, e ndarë nga krerët e shtetit. Në sheshin e Flamurit në Vlorë, drejtuesit lokalë të Partisë Demokratike dhe deputetët që udhëtuan nga Tirana vendosën kurora me lule, pas përfundimit të ceremonisë së ngritjes së flamurit nga kryeministri Edi Rama, presidenti Bajram Begaj dhe kryeministri i Kosovës Albin Kurti.

Sali Berisha, lideri historik i Partisë Demokratike, nuk mori pjesë në ceremoninë e Vlorës, pavarësisht se ishte pas një fitoreje të rëndësishme politike. Ai u shfaq vetëm online në një aktivitet të organizuar nga demokratët, ku e cilësoi 28 Nëntorin si “Gëzuar festën e Festave, datën e lindjes, datën e re të lindjes së Shqipërisë moderne, ditën e Pavarësisë.
Një ditë kjo në të cilën Ismail Bej Vlora, me një vizion gjenial dhe në kushte tërësisht të kundërta me ëndrrën e tij dhe të shqiptarëve, ngriti në Vlorë flamurin e Skënderbeut, shpalli Pavarësinë në një akt shpëtimtar të ekzistencës së Shqipërisë, por edhe të kombit shqiptar”, deklaroi Berisha. Por edhe në ditën që njihet si përbashkuese për shqiptarët, nuk harroi akuzat për kreun e qeverisë: Edi Ramën, që e quajti shqipfolës që zbaton politikat serbe. “Sot në Tiranë qeveris një shqipfolës, që zbaton në këtë vend pas 112 vitesh pavarësi, zbaton pikë për pikë politikën Çubrilloviçit dhe ka përzënë nga Shqipëria në 10 vite, më shumë shqiptarë se çdo pushtim tjetër deri sot.


Riktheu arrestimet, burgjet politike dhe përvetësimin e papërmbajtur masiv të pasurive publike, zhyti shqiptarët në mjerin progresiv.” s përfaqësuesit e Partisë së Lirisë nuk u shfaqën në krah të demokratëve në festime.

Në përvjetorin e Pavarësisë, Partia e Lirisë nuk ishte e pranishme në festimet e opozitës. Tedi Blushi, përfaqësues i kësaj partie, u shpreh se vitin e ardhshëm do të festohet “Nëntori i Tretë” me Ilir Metën në krye, duke premtuar një Shqipëri të Lirë, Sovrane dhe Demokratike. Ilir Meta, edhe pse i burgosur, e uroi festën e Pavarësisë në rrjetet sociale, duke e cilësuar këtë ditë si një simbol të bashkimit për mbrojtjen e lirisë, vlerave dhe identitetit kombëtar.

Kreu i Partisë Demokratike Euroatlantike, Lulzim Basha, gjithashtu dha urimet e tij për 28 Nëntorin, duke e cilësuar këtë ditë si më të rëndësishmën për identitetin kombëtar të shqiptarëve.