Ka ndërruar jetë në Spitalin e Traumës në Tiranë, 30-vjeçari Arbër Shakaj, i cili më 20 nëntor ra aksidentalisht nga kati i tretë i një pallati në ndërtim në Vlorë. Sipas policisë, ngjarja ndodhi gjatë punës në pallatin që ndodhej në ndërtim e sipër, dhe Shakaj u dërgua menjëherë në Tiranë për mjekim të specializuar pasi gjendja e tij ishte kritike.
Pavarësisht përpjekjeve të mjekëve, pas 9 ditësh, 30-vjeçari nuk mundi të mbijetonte nga plagët dhe ndërron jetë në Spitalin e Traumës.
Një ditë pas aksidentit, Policia e Vlorës arrestoi administratorin e firmës Greze SHPK, Leonidha Capi, 42 vjeç, dhe procedoi në gjendje të lirë inxhinierin zbatues, Vasil Gavana, 70 vjeç, për ngjarjen që shkaktoi tragjedinë. Hetimet po vazhdojnë për zbardhjen e plotë të rrethanave të aksidentit.
