Një shtetas shqiptar është arrestuar nga policia malazeze, pasi ka rezultuar i kërkuar nga autoritetet franceze. Shtetasi shqiptar, F. S, u ndalua gjatë kontrollit kufitar në pikën e kalimit Sukobin (Muriqan), ku u konfirmua se kishte një urdhër-arresti ndërkombëtar nga Franca.

F. S është dënuar me 3 vjet burg nga gjykatat franceze, me akuzën e vjedhjes dhe vjedhjes me anë të mashtrimit në mënyrë të organizuar dhe të dhunshme. Ky vendim është dhënë nga Gjykata Penale në Grasse të Francës.

Aktualisht, shqiptari po përballet me procedurat hetimore në Malin e Zi, dhe do të paraqitet para gjyqtarit hetues të Gjykatës së Lartë në Podgoricë për të vendosur nëse do të ekstradohet drejt Francës për të vuajtur dënimin.