Ekipi i inspektorëve të Agjencisë së Aviacionit Civil (AAC), i udhëhequr nga drejtori Dragi Stojanoski, ka kryer një kontroll të jashtëzakonshëm në TAV Maqedoni, pas incidentit që përfshiu presidenten e Kosovës, Vjosa Osmani. AAC ka njoftuar se gjatë këtij inspektimi fillestar është konstatuar se shërbimet e aeroportit përgjegjës për kontrollet e sigurisë kanë vepruar në mënyrë profesionale dhe në përputhje me rregulloret ndërkombëtare, pa bërë lëshime në standardet dhe procedurat e vendosura, pavarësisht presionit nga personat që shoqëronin pasagjerin.

AAC bëri të ditur se refuzimi për të kryer kontrollet standarde të sigurisë nga pasagjerët, përfshirë rastet në vitet 2022 dhe 2023, është trajtuar me profesionalizëm nga ana e aeroportit. Vetëm pasi piloti refuzoi të pranojë pasagjerët pa një kontroll sigurie, ato u realizuan sipas protokollit të përcaktuar.

AAC theksoi se nëse zyrtarët e TAV Maqedoni do të vepronin ndryshe nga rregullat e përcaktuara dhe do të lejonin shmangien e procedurave të parapara, ata do të përballeshin me sanksione serioze nga Agjencia e Aviacionit Civil. Kjo është një masë që synon të ruajë integritetin e sigurisë ajrore në përputhje me standardet ndërkombëtare. Për çdo dyshim lidhur me besueshmërinë e këtyre standardeve, AAC rekomandon aplikimin e tyre në një nga aeroportet ndërkombëtare evropiane për të siguruar zbatimin e tyre të plotë.