Aktivisti dhe politikani Adriatik Lapaj ka bërë një thirrje të fortë publike për bashkim të forcave opozitare kundër qeverisë së Edi Ramës. Ai iu drejtua figurave të njohura të politikës si Arlind Qorri, Agron Shehaj dhe Endri Shabani, duke i ftuar të lënë mënjanë interesat personale dhe të krijojnë një front të përbashkët për ndryshimin e vendit.

“U bëj thirrje të rinjve dhe të gjithë atyre që duan një ndryshim të vërtetë: Ejani të bashkohemi, ejani t’i çajmë dhe shpartallojmë! Lëreni egon mënjanë dhe t’i japim mundësinë shqiptarëve të çlirohen nga kjo bandë që po i mban peng,” deklaroi Lapaj në një mesazh të drejtpërdrejtë.

Kjo thirrje vjen në një moment kritik për opozitën shqiptare, e cila duket ende e përçarë përballë mazhorancës socialiste. Deri tani, asnjë nga figurat e përmendura nuk ka reaguar zyrtarisht ndaj kësaj thirrjeje. Si Arlind Qori ashtu edhe Agron Shehaj kanë deklaruar më herët synimin e tyre për të garuar të vetëm në zgjedhje, duke lënë të hapur mundësinë e bashkëpunimeve vetëm në kushte specifike.

Megjithatë, apeli i Lapajt mbart një ton emocional dhe urgjent, duke shpresuar që ai të shërbejë si një sinjal për reflektim dhe bashkim të forcave opozitare për të ofruar një alternativë të besueshme për qytetarët shqiptarë. Mbetet për t’u parë nëse kjo thirrje do të sjellë një ndryshim në qasjen e liderëve opozitarë në ditët në vijim.