Kreu i koalicionit Nisma–Shqipëria Bëhet, Adriatik Lapaj, i cili siguroi mandatin e vetëm të kësaj force politike nga qarku i Tiranës në zgjedhjet parlamentare të 11 majit, ka bërë publike kërkesën për rinumërim votash në qarqet Fier dhe Vlorë.
Përmes një postimi në rrjetet sociale, Lapaj pretendon se, pas analizës së pamjeve filmike të siguruara nga Komisioni Qendror i Zgjedhjeve, janë evidentuar mospërputhje domethënëse mes votave reale në kuti dhe procesverbaleve të miratuara nga KZAZ-të.
“QARKU FIER DHE VLORË DUHEN RINUMËRUAR” – shkruan Lapaj në postim, duke shtuar se ZAZ nr. 59 në Fier ende nuk i është vendosur në dispozicion.
Sipas tij, në disa kuti rezulton se janë shtuar vota për parti të tjera – kryesisht për Partinë Socialiste – ose janë hequr vota nga Nisma Shqipëria Bëhet dhe forca të tjera opozitare. Ai thekson se në këto qarqe, PS i ka marrë mandatet “me diferencë të ngushtë” dhe prandaj kërkohet një proces i drejtë dhe transparent rinumërimi.
Pretendimet konkrete të renditura nga Lapaj për manipulime:
• ZAZ 55, VNV 55/3, kutia 2831/00 – i janë shtuar 4 vota PS dhe janë hequr 2 vota Nismës SHB.
• ZAZ 60, VNV 60/3, kutia 3017 – 2 vota të pavlefshme janë regjistruar si të vlefshme për PS-në.
• ZAZ 60, VNV 60/3, kutia 2997/00 – +2 vota për PD, +4 vota për PS.
• ZAZ 56, VNV 56/5, kutia 288/01 – +2 vota për PS, –1 votë për Lëvizjen Atdheu.
• ZAZ 56, VNV 56/3, kutia 2866/01 – –1 votë për Nisma SHB, +3 vota të pavlefshme.
• ZAZ 56, kutia 2862/01 – –2 vota për Nisma SHB, +2 vota të pavlefshme.
Lapaj shton se çdo kuti ku dyshohet për manipulim do të shoqërohet me kallëzim penal për personat përgjegjës, ndërsa kërkesa për rinumërim do të paraqitet zyrtarisht në KQZ brenda ditës së sotme.
“Ne edhe mund mos i kemi ato mandate, por edhe 1 votë të jetë prekur do ndiqen penalisht.”, thekson ai.
Kjo lëvizje vjen në një klimë post-zgjedhore të tensionuar, ku disa forca politike të vogla kanë ngritur dyshime mbi procesin e numërimit dhe integritetin e të dhënave të raportuara nga KZAZ-të në qarqe të caktuara.
