Nënkryetari i Kuvendit dhe deputeti demokrat Agron Gjekmarkaj ka mbajtur një fjalim të ashpër sot në Parlament, ku akuzoi mazhorancën për kapjen e institucioneve, mbylljen e gojës së opozitës dhe degradimin e jetës parlamentare.

“Kuvend që nuk funksionon dhe nuk punon. Një Kuvend ku është hequr e drejta e fjalës, s’ka interpelanca, pyetje e përgjigje, por vetëm arrogancë e indiferencë,” tha Gjekmarkaj, duke shtuar se PS “miratoi një qeveri e program që s’ka zbatuar as 30% të premtimeve të kaluara.”

Deputeti demokrat akuzoi gjithashtu mazhorancën se ka fituar zgjedhjet e 11 majit me farsë elektorale dhe me arrestimin e liderit të opozitës, Sali Berisha.

“Debatit i keni shpallur luftë, të vërtetën e keni bërë armike dhe opozitën doni ta merrni peng. Por e vërteta nuk mund të merret zvarrë,” deklaroi ai.

Gjekmarkaj foli edhe për çështjen e minatorëve të Spaçit, duke denoncuar trajtimin e padrejtë ndaj tyre:
“Minatorët e Spaçit i trajtoni si kriminelë dhe nuk u jepni statusin që meritojnë, ndërsa kriminelët i ngrini në piedestal.”

Në përfundim të fjalës së tij, Gjekmarkaj theksoi se mazhoranca është e destinuar të dështojë, ndërsa Shqipëria, sipas tij, “nuk po ecën drejt Europës, por po rrëshqet në një Arnautistan.”