Në një intervistë të fundit në emisionin “Big Brother Radio” me Elona Duro, Livia Brunga, ish-banorja e Big Brother, ka folur për strategjinë e saj gjatë lojës dhe për situatat më të diskutueshme të ditëve të fundit në shtëpi. Livia u eliminua të martën dhe analizoi më thellë zhvillimet në program, duke komentuar mbi dinamika të ndryshme mes banorëve.

Një nga temat që u përmend gjatë intervistës ishte lidhja e saj e shkuar me Mevlan Shabën, i cili gjithashtu ishte i ftuar në emisionin “Ndryshe” me Salsano Rrapin dhe Elona Duron. Lidhja e tyre ka qenë një temë e diskutuar shumë në rrjet, veçanërisht pas përmendjes së disa dinamikave të saj në BBV.

Livia, e cila ka qenë pjesë e lojës gjatë periudhës që Mevlani bëri disa deklarata për të, shprehu mendimet e saj lidhur me ato komente. Ajo tha: “E kam parë, por që është hera e parë që po e dëgjoj pak më shumë me vëmendje sepse kam qenë shumë e ngarkuar sapo dola nga Big Brother.” Ajo theksoi se ka reaguar me forcë ndaj Mevlanit në një moment kur ai nuk mund të i jepte një përgjigje të drejtpërdrejtë, por e justifikoi këtë si një reagim të natyrshëm për situatën.

Livia shtoi: “Besoj është kuptuar nga rrugëtimi im në Big Brother, nga ky mesazh dhe besoj se nuk ka nevojë për shpjegime më të thella sepse do të ishte pak një goditje ndaj njerëzve që deri diku nuk kanë faj dhe nuk është e drejtë.” Ajo gjithashtu e kuptoi nevojën e Mevlanit për të shpjeguar veten, duke pranuar se ai nuk është fajtor për ndjenjat e tij, por theksoi se ndjenjat dhe marrëdhëniet nuk mund të imponohen.

Në fund, Livia theksoi se mesazhi i Mevlanit është një formë mbështetjeje për të, pasi ai ka parë sulmin që ajo ka përjetuar gjatë qëndrimit të saj në Big Brother, duke e konsideruar këtë një mundësi për të shëruar zemrën dhe për të ecur përpara.