Fluturimi i linjës “Air Albania” nga Tirana drejt Stambollit, i planifikuar të nisej sot (të mërkurën) në orën 18:20, është anuluar papritur dhe pa asnjë shpjegim zyrtar, duke shkaktuar kaos dhe penalizuar rëndë udhëtarët, mes tyre edhe Kombëtaren shqiptare të futbollit për vajza.
Federata Shqiptare e Futbollit njoftoi se ekipi kombëtar, i cili udhëtonte drejt Turqisë për dy miqësoret e parashikuara më 28 nëntor dhe 1 dhjetor, mbeti i bllokuar në aeroport, pasi kompania ajrore nuk dha asnjë komunikim, zgjidhje alternative apo asistencë minimale, siç kërkojnë standardet ndërkombëtare të transportit ajror.
Sipas burimeve të FSHF-së, futbollistet dhe stafi teknik u detyruan të kthehen mbrapsht pas orësh të tëra në pritje, pasi u informuan vetëm se fluturimi “nuk do të kryhej”. Zyra e “Air Albania”-s në aeroport ishte e mbyllur, ndërsa numrat e telefonit të kompanisë rezultonin të fikur, duke e bërë situatën edhe më absurde për pasagjerët, të cilët nuk arritën të marrin asnjë sqarim.
Anulimi ka prishur tërësisht programin e Komëbëtares së vajzave, ndërkohë që Federata Turke e Futbollit priste ekipin shqiptar sipas planit të dakordësuar.
Ky incident i pashpjeguar ngre pikëpyetje serioze për funksionimin dhe përgjegjësinë e “Air Albania”-s ndaj pasagjerëve të saj, teksa rasti i sotëm tregon se mungesa e komunikimit dhe improvizimi sjellin pasoja të drejtpërdrejta për institucionet, sportin dhe qytetarët e zakonshëm që varen nga linjat ajrore për udhëtime zyrtare apo personale.
FSHF konfirmon se Kombëtarja e vajzave pritet të niset paraditen e së enjtes me një linjë tjetër ajrore drejt Stambollit, duke bërë të mundur zhvillimin e ndeshjeve të planifikuara.
