Një aksident i rëndë rrugor ka ndodhur në aksin “Korçë-Pogradec” rreth orës 15:30, ku përplasja mes dy automjeteve ka lënë tre persona të plagosur. Mjeti tip “Benz”, i drejtuar nga shtetasi B. Xh., është përplasur me automjetin tip “Seat”, me drejtues O. Xh. Si pasojë, të dy drejtuesit dhe një pasagjer i automjetit “Seat” janë dërguar në spital për ndihmë mjekësore dhe fatmirësisht janë jashtë rrezikut për jetën.

Pamjet e para nga vendngjarja, të sjella nga Report TV, tregojnë përmasën e përplasjes, ku një prej të plagosurve është shtrirë në asfalt. Policia, zjarrfikësja dhe tre ambulanca kanë mbërritur në vendngjarje për të ofruar ndihmë dhe për të menaxhuar situatën. Aksidenti shkaktoi bllokim të rrugës për rreth një orë e gjysmë, duke krijuar radhë kilometrike.

Grupi hetimor ka nisur punën për të zbardhur rrethanat e këtij aksidenti, ndërsa policia ka bërë thirrje për kujdes të shtuar gjatë drejtimit të automjeteve në rrugë, veçanërisht në akse të ngarkuara dhe në kushte të rënda atmosferike.