Një aksident i rëndë ka ndodhur në Toskanë, ku një person ka humbur jetën dhe 25 të tjerë janë lënduar. Ngjarja ka ndodhur në një autostradë afër qytetit të Arezzo, ndërsa shkaqet e aksidentit mbeten ende të paqarta. Dy prej të lënduarve janë dërguar me helikopter në spital për shkak të plagëve të rënda.

Autobusi, i cili u përplas fillimisht me një parmak në autostradë, ishte duke transportuar turistë kinezë. Sipas agjencisë italiane të lajmeve Ansa, autobusi po udhëtonte nga Roma në Firence dhe kishte gjithsej 45 persona në bord. Presidenti i Toskanës, Eugenio Giani, konfirmoi se pasagjerët ishin turistë kinezë.

Zjarrfikësit patën vështirësi të nxirrnin disa pasagjerë nga autobusi që ishte bllokuar në parmakë, por në fund arritën t’i largonin të gjithë. Incidenti ka shkaktuar tronditje dhe hetimet për zbardhjen e shkaqeve të aksidentit janë ende në vazhdim.