Një punëtor 45-vjeçar ka pësuar dëmtime të rënda, por jashtë rrezikut për jetën, gjatë një aksidenti të ndodhur të martën në një nga galeritë e kromit në Bulqizë.

Sipas njoftimit të Policisë, drejtuesi teknik i minierës, 40-vjeçari Sh.D., banues në Tiranë, është proceduar penalisht për “Shkelje të rregullave të mbrojtjes në punë”. Autoritetet sqarojnë se drejtuesi nuk ka marrë masat e nevojshme të sigurisë, duke sjellë dëmtimin e punëtorit O.B., i cili aktualisht ndodhet në spital.

Materialet procedurale për rastin janë referuar Prokurorisë pranë Gjykatës së Shkallës së Parë të Juridiksionit të Përgjithshëm Dibër, për veprime të mëtejshme hetimore.