Një aksident i rëndë me katër viktima të rinj ka tronditur opinionin publik në aksin Prezë – Fushë Krujë. Enejd Laçi (25 vjeç), Erild Laçi (20 vjeç), Andi Laçi (22 vjeç) dhe Enrikejd Kurti (24 vjeç) humbën jetën kur automjeti i tyre, një “Benz” me impiant gazi, u përplas me një betoniere, duke shpërthyer në flakë.

Policia ka arrestuar tre persona në lidhje me aksidentin:

• Aleksandër Krrashi (24 vjeç), drejtuesi i betonierës, i cili nuk kishte leje për këtë kategori mjeti dhe u largua nga vendngjarja pas aksidentit.

• Valentin Krrashi, i cili dyshohet se ndihmoi Aleksandrin të arratisej pas ngjarjes.

• Danjel Koxha, menaxheri i kompanisë që kishte punësuar shoferin pa patentë.

Ndërkohë, administratori i biznesit është shpallur në kërkim.

Detaje të reja tregojnë se automjeti i të rinjve ishte blerë vetëm katër ditë më parë, ndërsa një prej viktimave, Andi Laçi, ishte fejuar vetëm një javë më parë.

Ceremonia mortore për viktimat u zhvillua sot në orën 16:00, ndërsa hetimet për shkaqet e sakta të aksidentit vijojnë.