Një ngjarje e rëndë në Loutsa, Greqi, i mori jetën 16-vjeçarit shqiptar Eljon Metaj, ndërsa dy bashkëmoshatarë të tij mbetën të plagosur. Aksidenti ndodhi të premten, më 13 shkurt, në kryqëzimin e rrugëve Dimokratias dhe Sotiros.

Sipas hetimeve paraprake, një nga të miturit dyshohet se kishte marrë fshehurazi çelësat rezervë të makinës së nënës së tij dhe, duke lëvizur me shpejtësi të lartë, humbi kontrollin e mjetit, i cili u përplas me një pemë.

Megjithatë, rrethanat e sakta mbeten të paqarta dhe versionet e dhëna janë kontradiktore. Nëna e 15-vjeçarit, i identifikuar si drejtues i dyshuar i automjetit, mohon që djali i saj të ketë qenë në timon në momentin e aksidentit. Ajo deklaron se i biri nuk dinte të drejtonte makinën dhe se ishte nxitur nga një shok për të marrë çelësat.

Nga ana tjetër, një shok klase i 15-vjeçarit ka hedhur poshtë këtë pretendim, duke thënë se ai kishte drejtuar edhe më parë automjetin pa dijeninë e nënës dhe se kishte mësuar të ngiste makinën nga babai i tij.

Prindërit e të miturit shprehen të tronditur nga ngjarja, ndërsa hetimet e autoriteteve greke vijojnë për të zbardhur plotësisht dinamikën e aksidentit që përfundoi në tragjedi.