Prokuroria Speciale e Kosovës ka ngritur aktakuzë të enjten kundër pesë personave për shtytje në kryerjen e veprave terroriste dhe posedim të paautorizuar të armëve. Të pandehurit, me inicialet L.B, B.V, E.B, A.H dhe A.S, janë arrestuar në maj të vitit 2023 nga autoritetet e sigurisë.

Sipas aktakuzës, ata kanë shpërndarë mesazhe nxitëse për të kryer vepra terroriste te persona të tjerë. Të pandehurit L.B dhe B.V janë gjithashtu akuzuar për mbajtje në pronësi dhe posedim të paautorizuar të armëve.

Gjatë arrestimit, Policia ka sekuestruar revole, armë automatike, armë rekreative pneumatike dhe pajisje elektronike. Autoritetet kanë informuar se të arrestuarit kanë qenë të përfshirë më herët në vepra penale në rajonin e Pejës.

Ligjet në Kosovë parashikojnë dënime të ndryshme për veprat terroriste dhe kundër rendit kushtetues. Ndër të tjera, që nga viti 2015, është ndaluar pjesëmarrja në luftëra të huaja, për të cilën vepër parashihen dënime deri në 15 vjet burgim.