Pak para ceremonisë së mbylljes së Lojërave Olimpike në Paris 2024, një incident ka ndodhur në zemrën e kryeqytetit francez. Një individ, i cili ishte ngjitur në mënyrë të paligjshme në strukturën e hekurt të kullës Eiffel, shkaktoi panik te autoritetet dhe qytetarët. I quajtur “spiderman”, ky individ u pa duke ngjitur kullën pa kushte sigurie, duke nxitur frikën se mund të ishte një terrorist.

Policia franceze urdhëroi menjëherë evakuimin e kullës dhe mbylljen e saj përkohësisht për të shmangur ndonjë rrezik të mundshëm. Mediat franceze dhe ndërkombëtare raportuan se individi nuk kishte autorizim për veprimin e tij dhe se kishte ndërmarrë sfidën e rrezikshme për shkak të dëshirës për të fituar “medaljen” e tij personale. Pas vendosjes së qetësisë në kullën emblematike, autoritetet arrestuan dhe shoqëruan personin për në komisariat për marrje në pyetje, duke konfirmuar se nuk kishte lidhje me terrorizmin.