Autoritetet kanë ngritur alarmin për praninë e bakterit të rrezikshëm “Listeria Monocytogenes” në djathin e butë francez “Französischer Weichkäse”, i prodhuar nga qumështi i pasterizuar.

Sipas njoftimit zyrtar, autoritetet gjermane kanë konfirmuar praninë e bakterit pas analizave laboratorike, ndërsa ky produkt është importuar në Shqipëri nga subjekti “INITALY RISTO & GUSTO”.

Autoriteti Kombëtar i Ushqimit (AKU) ka reaguar menjëherë pas njoftimit dhe ka nisur kontrollet për bllokimin dhe asgjësimin e produktit. Megjithatë, inspektorët kanë konstatuar se e gjithë sasia e importuar është shitur, duke e bërë të pamundur ndërhyrjen në treg.

Bakteri Listeria është veçanërisht i rrezikshëm për gratë shtatzëna, foshnjat, të moshuarit dhe personat me imunitet të dobësuar, pasi mund të shkaktojë infeksione të rënda në gjak, tru apo palcë kurrizore.

Tek personat e shëndetshëm, simptomat mund të përfshijnë ethe, dhimbje muskujsh, lodhje dhe diarre.
AKU u bën thirrje konsumatorëve që kanë blerë këtë produkt të mos e konsumojnë dhe të njoftojnë menjëherë autoritetet për çdo rast të dyshuar.