Deputetja e PD dhe zv.presidentja e EPP Women, Albana Vokshi, ngriti sot shqetësimin e fortë për Shqipërinë dhe dy shtete të tjera që nuk kanë paraqitur raport mbi zbatimin e Kartës Sociale Evropiane. Gjatë fjalës së saj në Asamblenë Parlamentare të Këshillit të Evropës, Vokshi theksoi se kjo nuk është një mangësi teknike, por një “dështim serioz i llogaridhënies demokratike”.

“Mos-raportimi minon besueshmërinë e të gjithë sistemit të mbrojtjes së të drejtave sociale dhe tregon se qytetarët nuk po dëgjohen,” deklaroi Vokshi. Ajo shtoi se të drejtat sociale nuk janë dytësore, por shtylla e stabilitetit dhe sigurisë demokratike.

Deputetja paralajmëroi se raportimi i rregullt mbi të drejtat sociale është jetik për të garantuar drejtësi sociale, kushte të denja jetese dhe kohezion shoqëror. Vokshi kërkoi ratifikimin e Kartës së Rishikuar, Protokollit të Ankesave Kolektive dhe Protokollit të Torinos, duke nënvizuar përgjegjësinë e parlamenteve dhe autoriteteve kombëtare për të integruar rekomandimet e Komitetit Evropian në legjislacionin dhe buxhetet kombëtare.

Fjala e Vokshit erdhi në 65-vjetorin e Kartës Sociale Evropiane dhe përforcoi mesazhin e Grupit të Partisë Popullore Evropiane: përforcimi i të drejtave sociale dhe mbikëqyrja demokratike e tyre janë thelbësore për një demokraci të qëndrueshme dhe besimin e qytetarëve.