Ish-deputeti i Partisë Demokratike (PD), Aleksandër Biberaj, i ftuar në një emision televiziv, ka komentuar situatën politike aktuale në vend, duke u ndalur te zhvillimet në kampin e opozitës.
Biberaj shprehu mbështetjen e tij për një koalicion të gjerë brenda spektrit politik të së djathtës, duke përfshirë edhe elementë të qendrës dhe të majtës, për të maksimizuar shanset e fitores ndaj qeverisë aktuale të kryeministrit Edi Rama.
Sipas tij, Sali Berisha, pavarësisht kontributeve të tij të mëdha, nuk është figura e duhur për të bashkuar demokratët dhe opozitën në këtë moment.
Sa i përket mundësisë që Argita Malltezi, e bija e ish-kryeministrit, të marrë drejtimin e PD, Biberaj tha se nuk e sheh si alternativë të përshtatshme, duke përmendur faktin se ajo, ashtu si i ati, është shpallur non-grata nga SHBA.
“Unë do të isha për një koalicion të gjerë brenda spektrit politik të së djathtës, përtej të djathtës, duke përfshirë edhe elementë të majtës dhe të qendrës, për të bërë të mundur fitoren. Shqipëria nuk e ka luksin të ketë një mandat të katërt të Edi Ramës.
Nuk jam optimist për një bashkim. Nëse rikthehemi te Kuvendi që u mbajt në stadium, Berisha u mbështet me premtimin se do largonte Bashën dhe Ramën dhe se do hapte PD duke bashkuar gjithë popullin opozitar. Doktor Berisha ka kontributet e tij, por edhe kontestime. Në këto momente nuk besoj se është figura që mund të bashkojë demokratët opozitarë. Duhej një figurë e papërfshirë dhe mundësisht të mos ketë qenë pjesë e ekzekutivit.
Unë mendoj se doktori duhet të ngrihet mbi interesat personale me synimin që e djathta të ngrihet në pushtet. Duhet ta kuptojë se koha e tij ka mbaruar, është një cikël. Nuk e shoh fare si alternativë Argita Malltezin, nuk është një parti familjare. PD ka kontributin e qindra mijëra demokratëve, ka aksionet tona politike aty që nuk mund të trashëgohen, për më tepër që edhe ajo është e shpallur non-grata nga amerikanët”, u shpreh ai.
Komentet e Biberajt theksojnë nevojën për një ndryshim strategjie dhe drejtimi brenda PD-së dhe një bashkëpunim më të gjerë për të mundësuar një fitore të opozitës në zgjedhjet e ardhshme.
