Ish-deputeti i Partisë Demokratike, Aleksandër Biberaj, ka folur në një emision televiziv rreth punës së Prokurorisë së Posaçme (SPAK). Ai vlerësoi përpjekjet e SPAK për të luftuar korrupsionin në Shqipëri, por theksoi se ende nuk është bërë mjaftueshëm.

Biberaj nënvizoi rëndësinë e asaj që po ndodh në vend, duke e cilësuar si herën e parë në historinë 34-vjeçare të pluralizmit politik në Shqipëri që zyrtarë të lartë qeveritarë po përfundojnë në burg.

Duke folur për kreun e SPAK, Altin Dumanin, Biberaj e përshkroi atë si një prokuror me integritet dhe përkushtim. Megjithatë, ai shtoi se brenda SPAK ka edhe individë të cilët ai i quajti “gjarpërinj të Edi Ramës”.

“Në këto kushte që jemi, SPAK po tregon që po lëviz gjërat, po përzien ujërat e korrupsionit, por jo sa duhet. Nëse janë dy njerëz që duhet të jenë prapa hekurave, ata janë Rama dhe Veliaj. Është e rëndësishme që, po të shohim historinë 34-vjeçare, po përfundojnë zyrtarë të lartë në burg,” tha Biberaj.

Ai gjithashtu shprehu dëshirën që SPAK të shkojë pas figurave më të mëdha të korrupsionit, të cilët ai i quajti “peshkaqenë”. Sipas Biberaj, kryeministri nuk ka detyrë të luftojë korrupsionin, por thjesht të mos vjedhë.

“Për Dumanin kam respekt, është një prokuror me integritet dhe i përkushtuar. E dimë që në SPAK ka edhe gjarpërinj të Edi Ramës,” përfundoi ai.