Altin Dumani, drejtuesi i Strukturës së Posaçme Antikorrupsion (SPAK), është përzgjedhur nga Departamenti Amerikan i Shtetit si një nga 10 kampionët ndërkombëtarë të antikorrupsionit për vitin 2024. Gjatë ceremonisë së zhvilluar për këtë rast, Sekretari Amerikan i Shtetit, Antony Blinken, e vlerësoi Dumanin për udhëheqjen e tij të jashtëzakonshme dhe kontributin në luftën kundër korrupsionit dhe krimit të organizuar në Shqipëri.

Blinken theksoi se SPAK është një institucion i ri, por që tashmë ka shënuar suksese të rëndësishme në goditjen e politikanëve të nivelit të lartë dhe grupeve kriminale. Ai u shpreh se Altin Dumani është një nga njerëzit më të besueshëm në Shqipëri dhe se SPAK ka arritur të ndërtojë një standard të ri besueshmërie në vend.

“Altin Dumani, nga Shqipëria, drejton një agjenci të re (SPAK). Ka goditur politikanë të lartë, por edhe grupe të rëndësishme kriminale, duke bërë punë të jashtëzakonshme dhe një nga njerëzit më të besueshëm dhe institucion me të besueshme në Shqipëri,” deklaroi Blinken.

Ky vlerësim ndërkombëtar për Dumanin dhe institucionin që ai drejton, thekson rëndësinë e luftës kundër korrupsionit si një nga sfidat kryesore për demokracinë dhe sundimin e ligjit në Shqipëri. Dekorimi është një mesazh i qartë për të inkurajuar përpjekjet për drejtësi të pavarur dhe transparencë në vend.