Autoriteti i Mediave Audiovizive (AMA) ka nisur një bashkëpunim me platformën TikTok për të ndihmuar qytetarët në raportimin e videove që kanë përmbajtje të rrezikshme dhe të dëmshme, sidomos për fëmijët dhe adoleshentët. Përdoruesit mund të dërgojnë linkun e videove të dyshimta online në AMA, e cila ka një komision të posaçëm që i shqyrton për të verifikuar nëse ka shkelje të ligjit.

Deri tani, janë bllokuar 36 video me përmbajtje problematike. Armela Krasniqi, kryetare e AMA-s, theksoi se raportimet dërgohen përmes verifikimit dhe analizimit për të përcaktuar nëse janë në shkelje të ligjit të AMA-s. Nëse ka shkelje, raportimi i bëhet TikTok-ut për veprime të mëtejshme.

Për sa i përket videove të raportuara për piraterinë, janë raportuar 355 video, nga të cilat 308 janë hequr nga TikTok. Gjithashtu, janë mbyllur 39 profile si rezultat i raportimeve për shkelje të shumta. TikTok ka bllokuar disa llogari të përdoruesve që janë gjetur në shkelje.

Krasniqi nënvizoi se shifrat më të larta të raportimeve dhe bllokimeve janë regjistruar nga kompani që ankohen për shkelje të të drejtave të autorit.