Takimi u zhvillua nën koordinimin e Bankës Botërore, e cila ka rekomanduar Shqipërinë për të dhënë eksperiencën e saj ndaj Ukrainës sa i përket procesit të përafrimit të legjislacionit me kuadrin e Bashkimit Evropian. Drejtori i Përgjithshëm Ekzekutiv i AMF-së shprehu gatishmërinë e Autoritetit për të ofruar të gjithë asistencën e nevojshme ndaj Komisionit të Letrave me Vlerë të Ukrainës.

Në cilësinë e negociatorit të kapitullit 9 “Shërbimet financiare”, Mete parashtroi hapat e ndjekura deri tani nga Shqipëria në procesin e negociatave, si edhe e njohu Kryetarin e Komisionit të Letrave me Vlerë të Ukrainës, Magomedov, me një udhërrëfyes për hapat e nevojshme në funksion të përafrimit legjislativ dhe punës përgatitore në kuadër të negociatave të anëtarësimit. Me ndërmjetësimin e Bankës Botërore, Autoriteti i Mbikëqyrjes Financiare do të asistojë Komisionin e Letrave me Vlerë të Ukrainës në procesin e përafrimit legjislativ me aquis të BE-së.

Kryetari i Komisionit të Letrave me Vlerë të Ukrainës e falënderoi Mete për mbështetjen dhe frymën e bashkëpunimit, si edhe vlerësoi se progresi i bërë nga Shqipëria në procesin e negociatave dhe eksperienca e Autoritetit me përafrimin legjislativ për tregjet nën mbikëqyrje, do t’i shërbejnë Ukrainës për të ecur më shpejt në rrugën e saj të integrimit evropian.

Në vitin 2020 u miratuan ligjet e reja për tregjet e kapitalit dhe sipërmarrjet e investimeve kolektive. Shqipëria vlerësohet të ketë një kuadër ligjor të avancuar në këtë drejtim, të përafruar me direktivat evropiane. Në zbatim të ligjeve të reja, Autoriteti ka përfunduar me miratimin e rregulloreve për sipërmarrjet e investimeve kolektive, ndërsa është në fazën finale të hartimit dhe miratimit të pjesës së mbetur të akteve nënligjore për tregjet e kapitalit.