Arbana Osmani dhe Eduart Grishaj ishin të ftuar në podcastin “Flasim” të kryeministrit Edi Rama, ku ndanë detaje interesante mbi karrierën dhe jetën e tyre private. Në këtë rrëfim ndryshe, çifti foli për rrugëtimin e tyre në televizion dhe përvojat personale.

Arbana kujtoi kontaktin e saj të parë me kryeministrin Rama, kur ai ishte ministër i Kulturës, Rinisë dhe Sporteve. Ajo ndau një kujtim të veçantë nga koha kur ishte 12 vjeçe dhe i kishte dërguar një letër nga Burreli.

“Në moshën 12-vjeçare, pas vitit 1997, ju kam dërguar një letër nga Burreli, të cilës ju i jeni përgjigjur. Ishe personazhi im i preferuar për atë kohë. Shkruaje editorial te revista ‘Klan’. Ke shkruar dhe shkruan shumë bukur,” tha moderatorja.

Kryeministri Rama konfirmoi se ai gjithmonë u përgjigjej letrave që merrte derisa u bë e pamundur t’i përgjigjej vetë. Ai shprehu krenarinë për krijimin e institucionit të parë në bashkinë e Tiranës, ku jepeshin me shkrim përgjigje për të gjithë ata që i drejtoheshin bashkisë.

“Jam shumë krenar sepse kam krijuar institucionin e parë në bashki që ishte bashkia e Tiranës, ku jepeshin me shkrim për të gjithë ata që i drejtoheshin bashkisë me shkrim 96-97 mijë përgjigje në vit,” tha Rama.

Ky episod i podcastit ofroi një perspektivë të re mbi marrëdhëniet personale dhe profesionale të figurave publike shqiptare, duke sjellë në vëmendje rëndësinë e komunikimit dhe ndikimit të tij në jetën e njerëzve.