Këngëtari i njohur shqiptar, Ardit Çuni, ka ndarë një moment prekës dhe të sinqertë nga rruga e tij drejt suksesit, duke treguar se para se të njihej nga publiku, ka kaluar sfida të mëdha financiare.

I ftuar në emisionin “Sol Summer” në Klan Kosova, Çuni rrëfeu se deri para dy vitesh nuk kishte as 1,000 euro në llogarinë bankare. Megjithatë, kjo nuk e ndaloi të udhëtonte dhe të investonte në karrierën muzikore, duke i habitur të gjithë me energjinë dhe vendosmërinë e tij.

“Deri para dy viteve nuk kam pasur as një mijë euro në bankë, por udhëtoja deri në fund të botës. Njerëzit thoshin ‘ua sa lekë ka Arditi’, por në të vërtetë, unë s’kisha para kur kthehesha”, – tha ai.

Këngëtari theksoi se gjithçka që ka ndërtuar e ka bërë falë besimit të palëkundur në vetvete dhe këmbënguljes për të mos u dorëzuar përballë sfidave. Ai inkurajoi të rinjtë që të mos e ndalin rrugën drejt ëndrrave, edhe kur situatat ekonomike duken të pamundura.

“Kur ke besim te vetja, mund të gjenerosh të ardhura vetë. Të rinjtë kanë potencialin e një banke, gjithmonë ka mundësi”, – u shpreh Çuni.

Në intervistë, ai foli edhe për sukseset artistike, përfshirë këngën “Të du” në festivalin “Kënga Magjike” dhe bashkëpunimet që kanë marrë miliona shikime në YouTube, duke dëshmuar se rruga e tij ka qenë e vështirë, por frymëzuese.

Ardit Çuni sot është një nga zërat më të dashur të muzikës moderne shqiptare – një shembull se si talenti, pasioni dhe qëndrueshmëria mund të thyejnë çdo barrierë.