Një rrjet i mirëorganizuar i shpërndarjes së drogës është zbuluar në zonën e Arezzo-s, ku protagonist dyshohet se ishte një shtetas shqiptar, Fabio Kallashi, 27 vjeç, banues në Lecce. Sipas hetuesve, Kallashi drejtonte një aktivitet të lulëzuar të trafikut të lëndëve narkotike në bashkëpunim me një bashkëpunëtor tjetër.

Gjatë operacionit, autoritetet italiane sekuestruan 45 kilogramë hashash – që përkthehet në mbi 332 mijë doza – si dhe 11 kilogramë marijuanë, nga të cilat mund të nxirreshin më shumë se 21 mijë doza. Kallashi u arrestua në fillim të marsit dhe u dërgua në burg, pas indikacioneve të forta të fajësisë dhe provave të shumta të mbledhura gjatë hetimit.

Megjithatë, së fundmi Gjykata Rishikuese e Firences pranoi pjesërisht ankimin e avokatit të tij, Umberto Leo, duke ndryshuar masën e sigurisë nga arrest me burg në arrest shtëpie. Hetimet për rrjetin e shpërndarjes së drogës vijojnë, ndërsa autoritetet po punojnë për identifikimin e bashkëpunëtorëve të tjerë.